Sab kuchh apne saath le aayi hun
Kuchh yun zindagi baant aayi hun 

Ek mutthi hansi, ek katra aansu
Ek naya chehra maang laayi hun 

Kuch tukde khayaalon ke samet ke
Har fikra se bekhayaal ho aayi hun  

Rishton ke tokre se is baar
Phir apna naam chhaant laayi hun 

Zameen se thokar kha ke main
Ab ek parat aasmaan laayi hun 

Ek dibbi bhar ke khushi se
Gham ka saaya laang aayi hun 

Sharm ki gathri ko chhod ke
Chehre ki surkhi sang laayi hun 

Kayi sapnon ko bhuja ke main
Sang apne naye armaan laayi hun 

Shama lekar baithi thi mushaayre mein
Nazmein apni kahin aur bhool aayi hun 

© Rakshita Verma
September 19, 2007