Kashmakash
Mere aasman mein aake dekho Ye dharti ab bhi pyaasi hai
Tere muskaan se jo aati hai Mitti ki saundhi khushboo hai
Shoonya mein kuch dhoondhti Khoyi hui si meri rooh hai
Hain kuch raahein yahaan jo Khud mein hi ghoom jaati hai
Jaati to seedhi hi hain magar Phir bhi uljhi nazar aati hai
Khol diya kuch darwaazon ko Chand deewar jahaan khade hue
Parde se chhan kar ab bhi dekho Dil mein roshni aa rahi hai
Sunte nahin hain log aksar Ye aankhein lagataar bolti hain
Waqt nikaala tha tumne ek baar Ab bhi shishi mein woh band hai
Poore hosh mein hoon phir bhi Halka suroor to zaroor hai
Bheeg gayi hain palkein meri Phir bhi yun nami ki kami hai
Mere aasman mein aake dekho Ye dharti ab bhi pyaasi hai
© Rakshita Verma
19th May 2008
|
42 Comment(s)
